Elevtenesta

Hei alle elevar på Slåtthaug vgs!

Her på Slåtthaug har vi ei eiga avdeling som heiter Elevtenesta. Å støtte og hjelpe deg slik at du har ei god tid som elev her på skulen, er i fokus for alle oss som jobbar i denne avdelinga.

Kapittel 12 i Opplæringslova seier at alle elevar i grunnskular og vidaregåande skular har rett til eit godt fysisk og psykososialt miljø som fremjar helse, inkludering, trivsel og læring. Elevtenesta har eit særleg oppdrag med å jobbe for at elevane skal få denne retten oppfylt.

Kva kan vi hjelpe med?

Treng du nokon å snakke med? Treng du studierettleiing? Treng du hjelp til å søke om stipend? Har du behov for tilrettelagd eksamen, eller ønsker du hjelp til å finne ut om du har behov for individuelt tilrettelagd opplæring (ITO)? Dette er berre nokre av tinga vi kan hjelpe til med. Avdelinga driv også biblioteket og står for skulefrukosten.

Ei viktig oppgåve for Elevtenesta er å arbeide førebyggande på område som mobbing, rus, psykisk helse og fråvær.

Av og til kan det vere slik at du treng hjelp frå andre instansar som pedagogisk-psykologisk teneste (PPT), Oppfølgingstenesta (OT), barne- og ungdomspsykiatrisk poliklinikk (BUP), NAV, barnevern eller politi. Vi kan hjelpe deg med å få kontakt med desse og samarbeider tett med alle tenestene.

Sjølv om dei tilsatte i elevtenesta har ulike roller og oppgåver, er dei alle her for deg som elev, og dei vil vere synlege i friminutta.

Vi kan også love at det vil skje kjekke ting i fellesareala våre gjennom året!

Kven er vi?

Du kan lese meir om kven vi er og kva vi gjer nedanfor.

Rådgivarane

Vi har tre rådgivarar her på skulen: Jan Fredrik, Kristin og Lena. Dei hjelper deg med spørsmål du har om utdanninga di, vidare planar og med å søke om tilrettelegging for deg på skulen. Rådgivarane jobbar tett med heile "laget rundt eleven".

Les meir om rådgivarane og om korleis du kan kontakte dei

NB! Føresette er hjarteleg velkomne til å ta kontakt om dei lurer på noko eller treng å diskutere ei sak.

Miljøfagarbeidarane

Miljøfagarbeidarane har ei rekke ulike arbeidsoppgåver, men aller mest tid bruker dei nok på følge opp elevar. Dei arbeider med både klassar og enkeltelevar som treng ekstra hjelp og støtte i ulike fag.
Du treffer dei også ofte ute i friminutta.

Kven gjer kva?

Oppgåvene til miljøfagarbeidarane varierer etter kor behova er størst. Nokre eksempel:

Benjamin gir hjelp og støtte til enkeltelevar og i klasserommet. I tillegg er han ansvarleg for tilbodet om frukost på skulen, og han er arbeidsleiar for elevmentorane.

Martin er inne i TIF- og EL-klassar og hjelper til i programfag. Han er også aktiv ute i friminutta. 

Rebekka er med inn i klasserommet og støtter elevgrupper og enkeltelevar i læringsarbeidet. 

Renate har hovudansvaret for biblioteket. Ho er også med i timar på HO der det er bruk for ekstra oppfølging.

Tor Kristian har største delen av arbeidet sitt knytt til hjelp og støtte i verkstaden på byggfag.

Usman er inne i dei fleste klassane på vg1 og vg3. Der gir han hovedsakeleg ekstra hjelp og støtte i matematikk. Dessutan driv han leksehjelpa i matematikk og er med på skulefrukosten. Han er også med i IKT-gruppa på skulen og kan særleg hjelpe elevar med programmet Lingdys.

Spesialpedagogane

Elise er faglærar og spesialpedagog. Ho er med i klassar der elevar treng tilrettelegging i matematikk eller naturfag.

Madelén jobbar med å kartlegge elevar for dysleksi.

Magnhild jobbar med å følge opp elevar med rett til individuelt tilrettelagd opplæring (ITO). Ho arbeider òg med å støtte elevar som treng særskild språkopplæring.

Ruth jobbar mykje med å kartlegge elevar for dysleksi. Dersom elevar får påvist dysleksi, hjelper ho dei med å søke om utvida lisens til programmet Lingdys.